Universiteti i Shkodrës “Luigj Gurakuqi” do të jetë më 12 dhe 13 tetor mikpritës i Simpoziumit Ndërkombëtar “Letërsia e huaj në Shqipërinë socialiste”.
Aktiviteti shkencor organizohet nga Qendra e Studimeve Albanologjike dhe Fakulteti i Shkencave Shoqërore, në kuadër të projektit spanjoll të kërkimit, zhvillimit dhe inovacionit ELASOC II.
Punimet do të zhvillohen në sallën “Vehbi Bala” të Bibliotekës së Universitetit, ndërsa aktiviteti do të nisë më 12 tetor, në orën 09:30.
Në fokus të simpoziumit do të jenë mënyrat se si veprat e huaja mbërritën te lexuesi shqiptar gjatë periudhës së socializmit. Studiuesit do të diskutojnë mbi përkthimin dhe qarkullimin e letërsisë së huaj, politikat kulturore dhe censurën, si edhe rolin e përkthyesve dhe institucioneve në përzgjedhjen dhe përcjelljen e këtyre veprave.
Dy ditët e aktivitetit do t’u japin hapësirë studiuesve shqiptarë dhe të huaj për të prezantuar kërkimet e tyre dhe për të diskutuar raportin mes letërsisë shqiptare dhe asaj të huaj gjatë regjimit socialist.
Simpoziumi synon të sjellë një qasje akademike mbi historinë e përkthimit, marrëdhëniet kulturore dhe mënyrën se si letërsia e huaj u përjetua dhe u ndërmjetësua në Shqipëri gjatë kësaj periudhe.
