Ndërsa pritet që në Asamblenë e Partisë Socialiste të diskutohet mocioni i saj për një “Marrëveshje të Re për Shqipërinë”, Elisa Spiropali ka zgjedhur të publikojë një mesazh që po interpretohet si një reflektim mbi zhvillimet brenda mazhorancës.
Në postimin e saj në rrjetet sociale, Spiropali ka ndarë një foto të një lumi në Shqipëri, të shoqëruar me shprehjen: “Mëso nga lumi; pengesat mund ta detyrojnë të ndryshojë rrjedhën, por kurrë destinacionin.”
Pak javë më parë, ajo i dorëzoi Asamblesë së PS-së një mocion ku kërkon nisjen e një dialogu më të gjerë me qytetarët dhe reflektim ndaj protestave e pakënaqësive të shfaqura gjatë kësaj periudhe.
Spiropali ka argumentuar se socialistët duhet të punojnë për më shumë përfaqësim, demokraci të brendshme, meritokraci dhe forcim të institucioneve, duke e nisur procesin e ndryshimit nga vetë partia.
Pas përfundimit të detyrës si ministre e Jashtme, ajo është shfaqur gjithnjë e më shumë si një zë kritik brenda Partisë Socialiste dhe grupit parlamentar.
Qëndrimet e saj kanë sjellë edhe përplasje publike me kryeministrin Edi Rama. Në prill, Rama e kritikoi për mungesën në Kuvend gjatë votimit lidhur me kërkesën e SPAK për arrestimin e ish-zëvendëskryeministres Belinda Balluku, si dhe për qëndrimet e saj kritike ndaj qeverisë.
Në atë kohë, Rama e paralajmëroi me tone të forta, ndërsa Spiropali iu përgjigj se “nuk është trimëri të përjashtosh, trimëri është të dëgjosh.”
Tashmë, mesazhi i fundit me lumin dhe “destinacionin” ka rikthyer vëmendjen te qëndrimet e saj dhe te ajo që pritet të ndodhë brenda PS-së.
