Mbreti Mohammed VI i Marokut ka mandatuar Fatima Ezzahra El Mansouri, koordinatore kombëtare e Partisë së Autenticitetit dhe Modernitetit (PAM), për të formuar qeverinë e re pas triumfit të partisë së saj në zgjedhjet parlamentare. Ky vendim përbën një ngjarje historike për Marokun, pasi El Mansouri shënon gruan e parë në krye të qeverisë së vendit.
Madhëria e Tij priti El Mansourin në pallatin mbretëror në Rabat, ku i besoi detyrën e përbërjes së kabinetit të ardhshëm. PAM, parti e qendrës së djathtë që ishte pjesë e koalicionit qeverisës në largim, fitoi 97 mandate nga gjithsej 395 në Dhomën e Përfaqësuesve. Megjithëse është forca kryesore, partia nuk ka arritur shumicën absolute, duke e detyruar El Mansourin të kërkojë marrëveshje me grupime të tjera për formimin e qeverisë së re.
Edhe pse kryeministrja e re është mandatuar, kompetencat kyçe të drejtimit të shtetit, sidomos në sektorët strategjikë, mbeten në duart e monarkut maroken.
El Mansouri, 50 vjeç dhe me profesion avokate, i është bashkuar PAM që në fillimet e saj në vitin 2008. Emri i saj u bë i njohur në Marrakesh kur, në moshën 33-vjeçare, u zgjodh e para grua në postin e kryetares së bashkisë në 2009. Më vonë, ajo u rizgjodh në këtë detyrë në 2021 dhe pas kësaj u bë ministre e Strehimit në kabinetin e kryesuar nga Aziz Ahanoush.
Gjatë fushatës, partia e El Mansourit u zotua për një rritje ekonomike mesatare vjetore prej 5% dhe uljen e inflacionit në 2%, me synimin për të ruajtur fuqinë blerëse dhe krijimin e të paktën një milion vende të reja pune.
Tubimi Kombëtar i të Pavarurve (RNI), nga ku vjen kryeministri aktual në largim Aziz Ahanoush, përfundoi zgjedhjet në vend të dytë me 66 mandate, duke humbur 30 ulëse krahasuar me rezultatin e mëparshëm. Ndërkohë, Partia Istiqlal siguroi 65 vende në Parlament.
Sa i përket opozitës, Partia për Drejtësi dhe Zhvillim (PJD), e cila e fokusoi fushatën te lufta kundër korrupsionit, arriti të rrisë numrin e mandateve nga 13 në 54. Një ditë pas shpalljes së rezultateve, Abdelilah Benkirane, sekretari i përgjithshëm i partisë, deklaroi se PJD nuk do të marrë pjesë në një koalicion qeveritar.
