Një shtetase ruse 28-vjeçare, e cila ishte shpallur e zhdukur prej fundit të korrikut, është gjetur pa jetë brenda një valixheje në një kanal afër Beogradit. Një 25-vjeçar me shtetësi turke është vënë në pranga si i dyshuar për vrasjen, ndërsa përpiqej të largohej nga territori serb.
Trupi i viktimës u zbulua të enjten në mbrëmje nga banorët vendas pranë kanalit në zonën Padinska Skela, një rajon i rrallëpopulluar në anën tjetër të Danubit, larg zemrës së Beogradit. Pasi u transportua për ekspertizë mjeko-ligjore, u konfirmua se bëhej fjalë për Lyudmila Turkova, ruseja për të cilën autoritetet kishin nisur kërkimet ditët e fundit.
Ministria e Brendshme e Serbisë bëri të ditur se i dyshuari kryesor është një shtetas turk 25-vjeçar, i cili u ndalua në aeroportin e Beogradit në tentativë për t’u larguar nga vendi. Emri i tij ende nuk është bërë publik nga autoritetet.
Sipas hetimeve, 28-vjeçarja dyshohet se u vra në orët e para të 26 korrikut brenda një apartamenti të marrë me qira në lagjen Borca. I dyshuari mendohet se e ka vendosur trupin në një valixhe dhe më pas e ka transportuar në Kanalin Vizelj, ku e ka hedhur, me qëllim për të fshirë çdo provë të krimit.
Lyudmila Turkova humbi kontaktet me të afërmit dhe miqtë në mbrëmjen e 25 korrikut kur pushoi së iu përgjigjur mesazheve. Menjëherë pas denoncimit të zhdukjes, policia nisi hetimet që përfundimisht sollën identifikimin e viktimës dhe ndalimin e të dyshuarit kryesor.
Aktualisht, prokuroria serbe po vijon hetimet për të zbardhur plotësisht rrethanat dhe motivet që çuan në këtë krim.
