Vllaznia vazhdon të hasë vështirësi larg shtëpisë, duke mos arritur të sigurojë rezultate të favorshme prej një kohe të gjatë. Humbja 3-1 që ekipi pësoi ndaj Egnatias në javën e shtatë të kampionatit “Abissnet Superiore” u bë një tjetër dëshmi e problematikave të skuadrës shkodrane në ndeshjet jashtë stadiumit “Loro Boriçi”.
Pavarësisht forcës së kundërshtarit, një nga skuadrat më të qëndrueshme të futbollit vendas, “kuqeblutë” duhet të përballen edhe me një statistikë të pakëndshme. Fitorja e tyre e fundit në transfertë daton që nga sezoni i kaluar, pikërisht më 4 prill 2023, kur triumfuan 0-2 kundër Partizanit në ndeshjen e vlefshme për javën e 30-të të kampionatit. Në atë takim, Kevin Dodaj u bë protagonist duke realizuar të dy golat që i dhanë shkodranëve një fitore të rëndësishme dhe tri pikë të vlefshme.
Megjithatë, që nga ai sukses, Vllaznia nuk ka arritur të marrë një tjetër fitore jashtë qytetit të vet. Ka kaluar më shumë se gjysmë viti pa triumf në transfertë për nëntë herë kampionët e Shqipërisë, fakt që nxjerr në pah një nga çështjet më të mëdha që ekipi duhet të zgjidhë sa më shpejt të jetë e mundur. Statistika bëhet akoma më alarmante duke pasur parasysh se një skuadër me pretendime të larta ka nevojë për rezultate të vazhdueshme, pavarsisht nëse luan brenda apo jashtë fushës së vet.
Humbja e fundit në Rrogozhinë e vërtetoi sërish këtë problem. Edhe pse Daniel Perez shënoi golin e tij të parë zyrtar me fanellën kuqeblu, ai moment pozitiv individual nuk mjaftoi për të shmangur disfatën 3-1. Probleme për Vllazninë nuk vijnë vetëm nga përballjet me kundërshtarë të veçantë, por nga paaftësia për të siguruar pikë rregullisht në udhëtim. Në një kampionat me konkurrencë të fortë dhe diferenca të vogla mes skuadrave, pikët e fituara në transfertë kanë peshë vendimtare për realizimin e objektivave sezonalë.
Çdo sfidë jashtë fushe që mbaron pa pikë e bën gjithnjë e më të vështirë pozitën e shkodranëve, të cilët duhet të gjejnë mjetet për të qenë më të fortë dhe efektivë në udhëtime. Trajneri Csaba Laszlo dhe ekipi i tij përballen tani me detyrën për të përmbysur këtë prirje negative sa më shpejt që të jetë e mundur. Fitorja ndaj Dinamos në javën e gjashtë tregoi se Vllaznia ka potencialin për të reaguar, por humbja me Egnatian risolli paqartësitë rreth vazhdimësisë së rezultateve.
Për të ndërtuar një sezon të suksesshëm, “kuqeblutë” nuk mund të mbështeten vetëm te rezultatet në “Loro Boriçi”. Ndërprerja e serisë pa fitore jashtë Shkodrës është kthyer në një synim më vete, ndërsa çdo ndeshje në transfertë mbetet një tjetër mundësi për të thyer një varg që po zgjat tej mase.
