FK Otrant Olympic arriti të triumfojë ndaj Vllaznisë me rezultatin 2-1 në ndeshjen miqësore të luajtur pasditen e së shtunës në stadiumin “Olympic” të Ulqinit. Takimi tërhoqi jo vetëm tifozët vendas, por edhe shumë mbështetës kuqeblu nga Shkodra që kishin udhëtuar për të ndjekur skuadrën e tyre.
Formacioni i Ulqinit kaloi në epërsi në pjesën e parë duke e mbyllur 45-minutëshin e parë me rezultatin 1-0. Pas pushimit, Vllaznia reagoi dhe arriti të barazonte shifrat përmes Muratajt, i cili hyri në fushë gjatë fraksionit të dytë. Pavarësisht se rezultati 1-1 mbeti i pandryshuar për pjesën më të madhe të kohës së mbetur, në minutat e fundit një luhatje në mbrojtjen shkodrane i dha Otrantit mundësinë të realizojë golin që vulosi fitoren.
Tekniku Edi Martini hodhi në fushë formacionin: Jukaj, Pusi, Latifi, Dëumfour, Sokol Uldedaj, Bardhi, Marku, Qato, Kobiljar, Perez dhe Zouhoule. Kjo ndeshje shërbeu kryesisht për të testuar lojtarët e rinj të afrur gjatë merkatos së verës. Në pjesën e dytë, trajneri aktivizoi edhe futbollistë të tjerë, mes të cilëve Murataj, që shënoi edhe golin e vetëm për kuqeblutë.
Për Vllazninë kjo ndeshje miqësore ishte e para pas largimit nga garat europiane. Ekipi pritet të luajë edhe disa sfida të tjera përgatitore deri në fillimin e kampionatit, ndërsa ndeshja e radhës do të jetë kundër Laçit, të mërkurën e ardhshme.
