Nesër në Itali do të zhvillohen greva dhe protesta të gjera, të nxitura nga rritja e çmimeve të jetesës dhe zhvendosja e fondeve shtetërore drejt sektorit ushtarak.
Sindikatat vendosin në qendër të kërkesave të tyre rritjen e pagave për të përballuar inflacionin, ndërsa punonjësit e porteve po mobilizohen njëkohësisht kundër përfshirjes në konflikte të armatosura.
Pritet që aktivitetet në të gjithë vendin të preken ndjeshëm, pasi Unione Sindacale di Base ka ftuar punonjësit e sektorit publik dhe privat të marrin pjesë në grevë. Në Romë do të mbahet protesta kryesore, ndërkohë që studentët pritet të protestojnë gjithashtu në shumicën e qyteteve të mëdha italiane. Sindikatat si Cobas, Adl, Clap dhe Sial kanë shpallur gjithashtu një grevë të përgjithshme, duke përjashtuar megjithatë sektorin e transportit nga kjo lëvizje.
Kërkesat kryesore të protestuesve përqendrohen te rritja e shpenzimeve të përditshme, për të cilat sindikatat theksojnë se po e vështirësojnë ndjeshëm jetesën. Një tjetër çështje që ngre shqetësim mbeten investimet në armatim.
Grevës i paraprijnë edhe ndërprerje në transportin publik: trenat nuk do të funksionojnë nga ora 21:00 e së enjtes deri në 20:59 të së premtes, ndërsa greva në aviacion do të zgjasë gjatë tërë ditës së premte.
Njëkohësisht, të premten punonjësit e porteve do të marrin pjesë në një aksion ndërkombëtar kundër tregtisë së armëve, politikave të riarmatimit dhe roli gjithnjë e më i madh i porteve në proceset e militarizimit.
Sipas organizatorëve, mbi 100 porte në 17 shtete dhe katër kontinente do të bashkohen në këtë mobilizim. Në Itali, manifestimet janë planifikuar në portet e Xhenovas, Livornos, Triestes, Civitavecchias, Ankonës, Ravenës dhe Gioia Tauros.
Një ndër kërkesat kryesore të USB-së mbetet përshtatja e pagave me rritjen e çmimeve, përmes rikthimit të sistemit “scala mobile” – një mekanizëm që dikur i harmonizonte automatikisht pagat me normat e inflacionit.
Ndër të tjera, sindikata kërkon ulje të çmimeve të produkteve bazë ushqimore, të faturave të shërbimeve publike dhe qirave, si dhe reduktimin e TVSH-së për mallra jetike. USB-ja thekson se qeveria shpenzon shumë për ushtrinë, ndërsa ndihmat për shëndetësinë, arsimin dhe shërbimet e tjera publike mbeten të pamjaftueshme.
