Kalaja e Shkodrës mbetet një nga atraksionet më të vizituara nga turistët që zgjedhin të eksplorojnë veriun e Shqipërisë. Çdo ditë, qindra udhëtarë nga mbarë bota vizitojnë këtë monument të rëndësishëm historik, për të njohur të kaluarën që mbart, si dhe për të përjetuar pamjet panoramike të qytetit, liqenit dhe lumenjve që e rrethojnë.
Vizitorët tregohen të impresionuar nga madhësia e kalasë, ruajtja e mirë e saj dhe peizazhi që zbulohet nga muret antike.
“Është shumë bukur. Jam shumë e lumtur që ndodhem këtu. Gjithçka është e këndshme, ndërsa pamja është e mrekullueshme”, shprehet një prej vizitoreve.
Për disa vizitorë, udhëtimi ka edhe kuptim personal. Një turiste me origjinë nga Shkodra, që jeton në Greqi, është rikthyer në qytetin e të atit pas shumë kohësh.
“Babai im është nga Shkodra. Kam qenë këtu kur isha e vogël, ndërsa kjo është hera e parë që vij si e rritur. Na pëlqen vërtet shumë dhe e duam këtë vend”, tregon ajo.
Turistët nga Belgjika theksojnë veçanërisht përmasat madhështore të kalasë dhe natyrën përreth saj.
“Pamja është shumë e bukur, ndërsa kalaja është e madhe dhe madhështore. Më pëlqen shumë Shqipëria”, shprehet një turiste belge.
Edhe udhëtarët katalanas mbeten të entuziazmuar, duke e vlerësuar kalanë si një nga fortesat më të bukura dhe më të mirëmbajtura që kanë parë.
“Këtu ka histori, qytet dhe shumë gjëra të ndryshme për të parë. Kalaja ka një shtrirje shumë të madhe dhe është ruajtur mjaft mirë. Pamja është e pabesueshme, me malet, lumenjtë, rrugët e vjetra dhe ato të reja”, shprehen ata.
Falë historisë së saj, legjendave dhe pamjes së veçantë, Kalaja e Shkodrës vijon të jetë një nga monumentet më të vizituara në vend. Ky simbol i trashëgimisë kulturore përfaqëson një ndër krenaritë më të rëndësishme të qytetit të Shkodrës.
