Rrjeti i vjetëruar dhe i amortizuar i shpërndarjes së energjisë elektrike po vazhdon të shkaktojë probleme të shumta për banorët e fshatit Samrish i Sipërm, në njësinë administrative Dajç të Bashkisë Shkodër. Sipas banorëve, prej vitesh nuk është realizuar asnjë investim domethënës për përmirësimin e infrastrukturës elektrike, pavarësisht ankesave dhe kërkesave të përsëritura drejtuar operatorit të shpërndarjes.
Ndërprerjet e shpeshta të energjisë po ndikojnë drejtpërdrejt në aktivitetin ekonomik të zonës, veçanërisht te bizneset që merren me sera dhe kultivimin e bimëve dekorative. Këto aktivitete mbështeten në sisteme automatike që funksionojnë me energji elektrike, duke bërë që çdo ndërprerje të sjellë humbje financiare për fermerët.
Problematikat nuk kufizohen vetëm te bizneset. Edhe familjet e zonës përballen shpesh me mungesë të energjisë elektrike për disa orë, çka vështirëson jetën e përditshme dhe rrit pakënaqësinë e banorëve.
