Muzeu i Kalasë së Shkodrës vijon të jetë një nga pikat më të vizituara të trashëgimisë kulturore në qytet, duke tërhequr çdo ditë vizitorë vendas dhe të huaj.
Një interes të veçantë po shfaqin edhe fëmijët e emigrantëve shqiptarë, të cilët gjatë pushimeve në vendin e origjinës vizitojnë muzeun për t’u njohur më nga afër me historinë, kulturën dhe rrënjët e familjeve të tyre.
Përmes objekteve muzeale, dëshmive arkeologjike dhe pasurisë historike që ruhet brenda mureve të Kalasë së Shkodrës, vizitorët kanë mundësinë të udhëtojnë në shekuj historie dhe të njihen me identitetin e një prej qyteteve më të lashta të Shqipërisë.
Muzeu mbetet një aset i rëndësishëm i trashëgimisë kulturore, duke luajtur një rol të veçantë në ruajtjen, promovimin dhe përcjelljen e vlerave historike e kulturore tek brezat e rinj, si dhe tek të gjithë ata që zgjedhin të zbulojnë historinë e Shkodrës.
