Në prag të sfidës Vllaznia–Teuta, e vlefshme për javën e pestë të Abissnet Superiores, Emiliano Musta ka dalë para mediave në stadiumin “Loro Boriçi”, ku ka folur për përballjen e radhës dhe situatën e kuqebluve.
Mbrojtësi-mesfushor ka vlerësuar se renditja aktuale, me Teutën në krye dhe Vllazninë në fund të tabelës, nuk mund të merret si një tregues i saktë i forcës së skuadrave, pasi kampionati sapo ka nisur.
Musta është shprehur optimist për duelin me durrsakët, duke theksuar se objektivi i Vllaznisë është i qartë: marrja e tre pikëve të para të sezonit.
Futbollisti ka folur edhe për eksperiencën e tij në Shkodër, duke veçuar pritjen që ka marrë që prej transferimit te Vllaznia. Ai ka shprehur dëshirën për të dhënë kontributin e tij në fushë dhe për të ndihmuar skuadrën të rikthehet aty ku, sipas tij, i takon të jetë.
