Situata e furnizimit me ujë të pijshëm në Malësinë e Madhe vijon të jetë problematike, ndërsa qytetarët në disa zona po përballen me mungesë të theksuar të ujit.
Përmes një reagimi të publikuar më 14 gusht, Ardian Hysa e ka cilësuar situatën “alarmante”, duke kritikuar Ndërmarrjen e Ujësjellësit dhe Bashkinë Malësi e Madhe.
Sipas Hysës, në Koplik furnizimi me ujë zgjat vetëm rreth 20 minuta në ditë, ndërsa në zona të tjera situata është edhe më e rëndë.
“Kopliku ka vetëm 20 minuta ujë, të tjerët me pikatore e deri nuk furnizohen aspak, si Hoti, Shkreli, Grizha, Vukpalaj etj.”, shkruan ai.
Hysa ngre pikëpyetje edhe mbi investimet e kryera ndër vite për ujësjellësit në këtë zonë, duke pretenduar se në Malësinë e Madhe janë investuar mbi 20 milionë euro nga qeveria shqiptare për sistemet e furnizimit me ujë.
Ndërkohë, sipas tij, banorët po detyrohen të blejnë ujin e pijshëm me paratë e tyre.
“Një turp i madh për Ndërmarrjen dhe Bashkinë Malësi e Madhe”, shprehet Hysa, duke kërkuar reagim për situatën e krijuar në disa zona të bashkisë.
Problemi i furnizimit me ujë mbetet veçanërisht shqetësues gjatë muajve të verës, kur temperaturat e larta rrisin edhe më shumë nevojën për ujë të pijshëm.
