Arben Malaj ka njoftuar se do të garojë si kandidat i pavarur për postin e kryetarit të Bashkisë së Vlorës në zgjedhjet vendore të vitit 2027.
Malaj, përmes një publikimi në Facebook, u është përgjigjur pyetjeve dhe interesimit nga qytetarë e mbështetës lidhur me qëndrimin e tij për kandidimin, duke vënë në pah pesë përparësitë që, sipas tij, ka një kandidaturë e pavarur.
Sipas tij, dalja jashtë strukturave partiake i siguron autonomi të plotë në vendimmarrje, pa u ndikuar nga interesa politike apo grupe të caktuara.
“Po! Unë do të kandidoj në 2027 si i pavarur për kryetar i Bashkisë Vlorë. Kjo është përgjigjja për çdo mbështetës dhe dashamirës, por edhe për çdo qytetar që më pyesin gjithnjë e më shumë”, shkruan Malaj.
Ish-ministri thekson mes avantazheve të tij pavarësinë në vendimmarrje, integritetin moral dhe besueshmërinë, mundësinë për të qenë fleksibël gjatë fushatës, sfidimin e drejtpërdrejtë të sistemit aktual politik, si dhe garantimin e një administrate të lirë nga ndikimi partiak.
Ai shton se një kandidaturë e pavarur i jep shans platformës së tij të bashkojë qytetarë, intelektualë, aktivistë, biznesmenë dhe aktorë të shoqërisë civile, duke evituar përçarjet politike.
“Vendimet do të marrin parasysh vetëm interesin e banorëve të Vlorës”, shkruan ai, duke theksuar angazhimin për një administratë të ndërtuar mbi meritokracinë dhe barazinë e mundësive për qytetarët dhe bizneset.
Arben Malaj ka mbajtur më parë detyrën e deputetit të Partisë Socialiste dhe ka qenë ministër i Financave në qeveritë socialiste të shkuara.
