Ferit Hoxha, ministri për Evropën dhe Punët e Jashtme, lajmëroi përmes rrjetit social X se mes Luksemburgut dhe Tiranës do të hapet një linjë e re fluturimesh direkte, të ofruara nga kompania ajrore Luxair.
Hoxha e cilësoi ardhjen e Luxair si një lajm shumë pozitiv për vendin, duke theksuar rëndësinë e pranisë së një tjetër kompanie ajrore nga Evropa në Shqipëri.
“Duke filluar nga 29 marsi 2027, kjo linjë e re që do të funksionojë gjatë gjithë vitit do të kryejë fluturime dy herë në javë, të hënave dhe të premteve, duke krijuar lidhjen e parë të rregullt ajrore direkte midis Luksemburgut dhe Shqipërisë”, shkruan Hoxha.
Sipas ministrit, kjo linjë e re ajrore do të sjellë më afër qytetarët, bizneset dhe komunitetet e të dy vendeve, duke forcuar lidhjet përkatëse.
Ministri Hoxha kishte vizituar selinë e kompanisë Luxair më 21 prill të këtij viti. Gjatë takimit me CEO-n e Luxair, Gilles Feith, u diskutua konkretisht mundësia për të hapur fluturime direkte mes Luksemburgut dhe Tiranës.
