Një fluks i rënduar automjetesh është shënuar këtë mëngjes në pikën kufitare të Muriqanit, ndërsa shumë emigrantë shqiptarë po udhëtojnë drejt vendit për të kaluar pushimet pranë familjeve.
Pamjet e dërguara nga qytetarët tregojnë një varg automjetesh që shtrihet për më shumë se 5 kilometra, duke nisur nga zona e Ulqinit në drejtim të Shkodrës. Qindra mjete kanë mbetur në pritje për të kaluar pikën kufitare.
Situata paraqitet e ngarkuar edhe në akset rrugore që lidhin Kroacinë me Malin e Zi, ku gjatë kësaj periudhe është shtuar ndjeshëm lëvizja e shqiptarëve që jetojnë në Europë dhe që po kthehen në Shqipëri për pushimet verore.
Kilometrat e shumta të përshkuara dhe pritjet e gjata në kufi nuk kanë ndalur emigrantët të vijojnë udhëtimin drejt atdheut, në një prej periudhave më të ngarkuara të sezonit veror.