Një incident i pazakontë është regjistruar sot në Tiranë, ku linja e autobusit “Shkozë-Qendër” është pezulluar përkohësisht.
Banorët dhe përdoruesit e kësaj linje kanë raportuar se drejtuesit e autobusëve kanë ndaluar mjetet gjatë orarit zyrtar të punës dhe kanë detyruar pasagjerët të zbrisnin në rrugë, me arsyetimin se do të ndalonin për të konsumuar kafe.
Sipas të pranishmëve, ky veprim i shoferëve është konsideruar i paprecedentë, pasi u ndërpre shërbimi publik pa asnjë njoftim apo arsye të justifikuar, referuar raportimeve të qytetarëve.
Për pasojë, udhëtarët e përditshëm të transportit publik në kryeqytet janë përfshirë nga pakënaqësia dhe indinjata, duke kërkuar reagim të shpejtë nga autoritetet përkatëse që të merren masat e nevojshme ndaj kësaj situate.
