Zbardhen të tjera të dhëna lidhur me aksidentin tragjik që ndodhi pasditen e kësaj të marte në Portin e Durrësit.
Një ngjarje e rëndë u shënua në pikën doganore, ku një shofer kamioni, teksa priste të përpunohej radha e tij, aksidentalisht përplasi për vdekje një koleg, edhe ai drejtues kamioni, i cili po shkonte të dorëzonte dokumentet e mjetit në skaner.
Sipas njoftimit të policisë së Portit të Durrësit, incidenti ndodhi në sheshin përpara skanerit, ku shtetasi Nikolin Mardari, 49 vjeç, banues në Berat, teksa drejtonte kamionin e tij, dyshohet se aksidentalisht ka përplasur shtetasin Nexhmi Shabani, 62 vjeç, me banim në Kosovë, që lëvizte në këmbë për të dorëzuar dokumentacionin e nevojshëm për skanimin e kamionit të tij.
Si rezultat i kësaj goditjeje, Nexhmi Shabani, 62 vjeç, humbi jetën. Ndërkohë, Nikolin Mardari është shoqëruar në Komisariat ku ndaj tij po kryhen veprimet përkatëse procedurale.
Grupi hetimor, nën udhëheqjen e Prokurorisë, vijon punën për të zbardhur plotësisht rrethanat e aksidentit.
