Afro 1 mijë qytetarë në Shkodër kanë marrë shërbim shëndetësor në banesë gjatë periudhës janar–qershor 2026, në kuadër të programit të kujdesit shëndetësor në komunitet.
Sipas Ministrisë së Shëndetësisë, ekipet mjekësore kanë vijuar vizitat pranë banesave të pacientëve, me fokus të veçantë te të moshuarit, personat me sëmundje kronike dhe grupet që kanë më shumë nevojë për monitorim të vazhdueshëm.
Ky shërbim synon të lehtësojë aksesin në kujdesin shëndetësor për qytetarët që për arsye shëndetësore apo vështirësish në lëvizje nuk mund të paraqiten rregullisht në qendrat shëndetësore.
Gjatë periudhës së verës, vizitat në banesë marrin një rëndësi të shtuar për shkak të temperaturave të larta, të cilat mund të ndikojnë veçanërisht te pacientët me probleme kronike dhe moshat e treta.
Ministria e Shëndetësisë bën me dije se ky program do të vijojë edhe në muajt në vazhdim, me synim ofrimin e kujdesit mjekësor më pranë qytetarëve.
