Gazmend Paja është përballur me ofendime gjatë ditës së sotme, teksa po kalonte në zonën e Kalasë së Tiranës. Pamjet që po qarkullojnë në rrjet tregojnë qytetarë të revoltuar, të cilët e ndalojnë me thirrje dhe fyerje, ndërsa aktori nuk shmang përplasjen verbale, por u përgjigjet me një gjuhë të ashpër.
Emri i Pajës është përfolur shpesh në debatet publike edhe për shkak të statusit të investitorit strategjik, nga i cili përfitoi për realizimin e një projekti me vlerë disa milionë euro në jug të vendit.
Aktori është konsideruar gjithashtu si një nga personat e afërt me ish-kryebashkiakun e Tiranës, Erion Veliaj, duke qenë ndër figurat publike që e kanë mbështetur atë publikisht.
Një vit më parë, Gaz Paja u paraqit në SPAK në kuadër të hetimeve për dosjen “Veliaj-Xoxa”. Sipas informacioneve të bëra publike në atë periudhë, ai u thirr për të dhënë shpjegime lidhur me transaksione dhe komunikime të zhvilluara me Erion Veliajn dhe Ajola Xoxën, të lidhura me çështje pronash dhe pasurish të paluajtshme.
