Drejtoria Rajonale e Tiranës ka vendosur të ndalojë me iniciativë punonjësin e Policisë së Shtetit, E. M., i cili dyshohet për kryerjen e veprës penale “Dhuna në familje”, sipas nenit 130/a të Kodit Penal.
Ndalimi është realizuar pas një sërë veprimesh hetimore që filluan menjëherë pas dyshimeve se ai kishte ushtruar dhunë fizike ndaj vajzës së tij të mitur. Pas një vlerësimi të kujdesshëm të rrethanave dhe me autorizimin e prokurorit, AMP ndërmori hapat përkatës që çuan në ndalimin e tij. Të dhënat e mbledhura janë dërguar në Prokurorinë pranë Gjykatës së Shkallës së Parë të Juridiksionit të Përgjithshëm Tiranë, ndërsa i ndaluari tani ndodhet në dispozicion të organit të akuzës për vazhdimin e procedurave ligjore.
AMP është e angazhuar për të mbrojtur ligjshmërinë, për të siguruar llogaridhënie dhe për të forcuar besimin e qytetarëve ndaj institucioneve të zbatimit të ligjit.
