Zjarri që ka përfshirë zonën e Pukës vijon të paraqitet problematik, ndërsa deri më tani raportohet se janë prekur rreth 120 hektarë sipërfaqe pyjore, një pjesë e tyre me pisha të zeza.
Në një reagim për situatën, Kliti Hoti ka publikuar pamje të dërguara nga banorë të fshatrave Tim dhe Gojan i Madh. Sipas banorëve, ekziston shqetësimi se flakët mund të avancojnë drejt një zone me pisha rreth 70-vjeçare, duke rrezikuar një tjetër sipërfaqe të rëndësishme pyjore.
Hoti ka shprehur mirënjohje për zjarrfikësit dhe të gjithë personat që prej mbrëmjes ndodhen në terren për përballimin e situatës.
Puka konsiderohet një nga zonat më të pasura me pyje dhe biodiversitet në veri të vendit, ndërsa përhapja e zjarreve në këto territore përbën një kërcënim serioz për ekosistemin dhe pasuritë natyrore të zonës.
Në reagimin e tij, Hoti ngre gjithashtu pikëpyetje mbi fondet e parashikuara për parandalimin e fatkeqësive natyrore. Në buxhetin e vitit 2026 janë planifikuar 1.5 miliardë lekë për projekte në këtë drejtim.
Pyetja që ngrihet është se sa prej këtyre fondeve kanë shkuar konkretisht për Pukën dhe sa është investuar për parandalimin e zjarreve dhe mbrojtjen e pyjeve në këtë zonë.
