Një problematikë e ngritur nga banorët e lagjes “Skënderbeg” në Shkodër është bërë publike nga deputeti i Partisë Demokratike, Kliti Hoti.
Sipas tij, automjetet që përdoren për grumbullimin e mbetjeve gjatë ditës, në përfundim të shërbimit parkohen pranë pallateve dhe banesave të zonës.
Banorët shprehen se prania e mjeteve në afërsi të shtëpive shoqërohet me erë të pakëndshme, duke e kthyer situatën në një shqetësim të përditshëm, veçanërisht gjatë temperaturave të larta.
Ata kërkojnë që të gjendet një hapësirë e përshtatshme për parkimin e automjeteve të mbetjeve, larg zonave të banuara, duke argumentuar se vendosja e tyre nën dritaret e banesave krijon probleme higjienike dhe cenon cilësinë e jetesës.
Deputeti Kliti Hoti i ka bërë thirrje institucioneve përgjegjëse që të ndërhyjnë për zgjidhjen e problematikës dhe të marrin në konsideratë kërkesën e banorëve të lagjes “Skënderbeg”.
