Ka lajme pozitive lidhur me gjendjen shëndetësore të këngëtares legjendare britanike Bonnie Tyler, e cila është zgjuar nga koma e shkaktuar artificialisht pas një periudhe më shumë se një muaji trajtimi intensiv në spital.
Sipas një komunikate nga ekipi i saj, artistja nuk ndodhet më në koma, megjithatë gjendja e saj mbetet serioze. Ajo po vazhdon trajtimin në repartin e kujdesit intensiv në një spital në Faro, ku mjekët shpresojnë për një rikuperim të suksesshëm. Këngëtarja, e njohur për hitin e saj “Total Eclipse of the Heart”, u shtrua me urgjencë në spital në fillim të majit, për shkak të komplikacioneve që u shkaktuan nga një perforim i zorrës. Pas një operacioni të rëndësishëm, mjekët vendosën ta mbajnë në koma të induktuar për të ndihmuar në procesin e saj të rikuperimit.
Gjendja e Bonnie Tyler ka qenë në fokusin e mediave ndërkombëtare gjatë javëve të fundit. Më herët, ishin raportuar detaje se ajo po merrte ventilim të asistuar dhe se mjekët ishin duke monitoruar me kujdes përparimin e saj shëndetësor. Menaxhmenti i këngëtares ka shprehur falënderime për fansat për mbështetje dhe mesazhet e shumta të dashurisë, duke theksuar se Bonnie është e vetëdijshme për mbështetje nga publiku në mbarë botën. Për shkak të gjendjes së saj shëndetësore, disa nga koncertet e planifikuara janë anuluar ose shtyrë.
Bonnie Tyler, një nga zërat më të njohur të muzikës rock dhe pop të viteve ’80, ka arritur famë ndërkombëtare me këngë si “Total Eclipse of the Heart” dhe “Holding Out for a Hero”, duke u bërë një prej artisteve më të adhurua në skenën muzikore britanike.
