Xhezair Avduli është transferuar nga KF Arsimi në KF Vllaznia, një lëvizje që ka për qëllim të zëvendësojë Andrej Jagon. Kuqeblutë, nën udhëheqjen e Edi Martinajt, kanë forcuar mbrojtjen e krahut të majtë. Arsimi, klubi ku Avduli ka qenë aktiv, ka ndarë detaje rreth këtij transferimi. Klubi shqiptar nga Maqedonia e Veriut ka marrë përsipër të mbajë 25% të të drejtave mbi kartonin e lojtarit, në rast se Vllaznia vendos ta shesë atë në të ardhmen.
Njoftimi i Arsimit: “KF Arsimi 1973 njofton se ka arritur marrëveshje me KF Vllaznia për transferimin e lojtarit tonë Xhezair Avduli.
Kjo lëvizje po ndodh për shkak të dëshirës dhe kërkesës së vetë lojtarit që të zhvillohet në një nivel të ri në karrierën e tij. Nga ana tjetër, klubi ynë do të ruajë 25% të të drejtave ekonomike për çdo transferim të mundshëm të tij në të ardhmen.
Tre vite më parë, Avduli u bashkua me klubin tonë si një futbollist i ri, me ambicie dhe ëndrra të mëdha. Gjatë kësaj periudhe, ai ka ecur përpara së bashku me ne, është zhvilluar profesionalisht dhe ka u bërë një pjesë kyçe e ekipit.
Ne jemi të nderuar për çdo hap të bërë së bashku dhe besojmë se e ardhmja e tij do të sjellë edhe shumë suksese.
Faleminderit për çdo moment, Xhezo! Përkushtimi dhe angazhimi yt do të mbeten gjithmonë pjesë e kujtimeve të bukura në familjen e Arsimit, dhe të urojmë suksese në këtë kapitull të ri të jetës tënde!”
Nga Gazeta Shkodra Sport
