Me rritjen e temperaturave gjatë sezonit veror, shatërvanët, çezmat publike dhe pikat e ujit bëhen gjithnjë e më të rëndësishme për qytetarët e Shkodrës.
Gjatë ditëve më të nxehta të korrikut, kemi anketuar qytetarët në lidhje me dobishmërinë e këtyre vendve për freskimin e trupit. shumica prej tyre e konsiderojnë këto pika si një ndihmë të vyer për hidratim dhe freskim gjatë lëvizjes në qytet, përveç se shprehin dëshirën për rritjen e numrit të tyre.
Në veçanti, zona qendrore e Shkodrës ofron disa pika ku qytetarët mund të kenë qasje në ujë ose të freskohen. Disa nga këto janë çezma publike, ndërsa të tjera janë ndërtuar nga Myftinia e Shkodrës dhe ofrojnë shërbim për kalimtarët dhe vizitorët çdo ditë.
Megjithatë, jo të gjitha këto pika janë në funksion. Siç është rasti me shatërvanin publik pranë lulishtes së Universitetit “Luigj Gurakuqi”, i cili nuk funksiononte, duke humbur kështu rolin e tij në një periudhë të nxehtë.
Në përgjithësi, qyteti ofron disa mundësi për t’u freskuar gjatë verës, por qytetarët besojnë se rritja e numrit të çezmave publike dhe sigurimi i funksionimit të të gjitha shatërvanëve do të ndihmonte në lehtësimin e përballjes me temperaturat e larta, si për banorët ashtu edhe për turistët që vizitojnë Shkodrën.
