Komuna e Tuzit do të vijojë edhe këtë vit të ofrojë transport publik pa pagesë për nxënësit dhe qytetarët.
Kryetari i Komunës, Lindon Gjelaj, ka bërë të ditur se shërbimi do të nisë më 1 shtator dhe do të jetë falas për të gjithë përdoruesit.
Nisma synon t’u lehtësojë familjeve shpenzimet e përditshme të transportit, veçanërisht atyre që kanë fëmijë të cilët udhëtojnë çdo ditë drejt shkollave. Përmes këtij shërbimi, komuna synon gjithashtu të rrisë përdorimin e transportit publik.
“Komuna e Tuzit vazhdon edhe këtë vit të sigurojë transport publik falas për nxënësit dhe të gjithë qytetarët”, ka njoftuar Gjelaj përmes rrjeteve sociale.
Transporti falas në Tuz vjen në një kohë kur në Shqipëri shumë familje, sidomos në zonat rurale dhe të thella, përballen ende me vështirësi dhe kosto të konsiderueshme për transportin e fëmijëve drejt shkollave.
Në përfundim të njoftimit, Gjelaj thekson se kjo është një prej masave konkrete të ndërmarra nga komuna në funksion të qytetarëve.
