Mbrëmjen e sotme, fshati Zhym në Njësinë Administrative Krutje të Lushnjes është përfshirë nga një ngjarje e rëndë ku dyshohet se një i ri ka vrarë nënën e tij në banesë dhe ka plagosur rëndë babanë.
Burime të para zyrtare bëjnë me dije se Florjan Dalladaku është identifikuar si autori i dyshuar i krimit. Dyshohet se Dalladaku, i cili vuante nga probleme të shëndetit mendor, ka qëlluar prindërit brenda shtëpisë së familjes.
Ngjarja ka shkaktuar një ndjesi të thellë tronditjeje te banorët lokalë. Në vendin e ngjarjes kanë mbërritur menjëherë forcat e Policisë dhe grupi hetimor, të cilët po punojnë për të sqaruar dinamiken e krimit.
Pas aktit të dyshuar, autori është larguar nga vendngjarja me automjet, ndërkohë që policia ka ngritur postblloqe dhe vijon ndjekjen për kapjen e tij.
Autoritetet janë duke vijuar hetimet për të dokumentuar plotësisht këtë ngjarje dhe për të zbuluar motivet që çuan në këtë krim. Informacione të tjera priten në orët në vijim.
