Një sherr mes dy vëllezërve ka përshkallëzuar në plagosjen e njërit prej tyre, mbrëmjen e sotme në lagjen nr. 13 të Korçës.
Burime paraprake bëjnë me dije se incidenti është regjistruar brenda banesës familjare, ku vëllezërit janë përfshirë në një konflikt për arsye të pavlera. Gjatë debatit, dyshohet se njëri prej tyre ka përdorur sëpatën për të goditur të vëllanë në shpatull, duke i shkaktuar plagë.
Menjëherë pas episodit të dhunshëm, autori është larguar nga shtëpia, por nuk ka arritur të shkojë larg. Efektivët e Komisariatit të Policisë Korçë kanë arritur ta lokalizojnë dhe shoqërojnë pak minuta pas ngjarjes.
Ndërkohë, personi i plagosur është dërguar në Spitalin e Korçës dhe është trajtuar nga stafi mjekësor.
Hetuesit vijojnë punën për të zbardhur plotësisht arsyet dhe dinamikën e konfliktit, ndërsa materialet do t’i kalojnë Prokurorisë sapo të përfundojnë veprimet procedurale.
