Një ngjarje që ka shkaktuar indignatë në Britaninë e Madhe ka përfunduar me dënimin e dy burrave për vdekjen e një foshnjeje 13-muajshe, Preston Davy, vetëm disa muaj pasi ishte adoptuar nga ata. Pas një gjyqi të gjatë tetëjavor në Gjykatën e Kurorës në Preston, juria shpalli fajtor 37-vjeçarin Jamie Varley për vrasjen e foshnjës, ndërsa partneri i tij, 32-vjeçari John McGowan-Fazakerley, u dënua për shkaktimin ose lejimin e vdekjes së fëmijës.
Gjatë procesit gjyqësor, u zbuluan detaje tronditëse në lidhje me trajtimin e foshnjës gjatë katër muajve të jetesës së saj me çiftin pas adoptimit në prill 2023. Varley u shpall gjithashtu fajtor për një sërë veprash penale, të tilla si abuzimi seksual ndaj një fëmije, si dhe keqtrajtimi i fëmijëve dhe prodhimi e shpërndarja e materialeve të pahijshme që përfshinin të mitur. Ndërkohë, McGowan-Fazakerley u dënuar për disa akuza që lidhen me keqtrajtimin e fëmijës dhe mosparandalimin e vdekjes së tij.
Siç u paraqitën dëshmitë në gjykatë, Preston, i përshkruar nga të afërmit dhe dëshmitarët si një foshnjë e lumtur dhe e dashur, kishte qenë i shtruar tri herë në spital gjatë katër muajve pasi ishte adoptuar. Fëmija vdiq më 27 korrik 2023 në Spitalin Blackpool Victoria, pas një arresti kardiak. Fillimisht, Varley pretendoi se e kishte lënë foshnjën për pak minuta në vaskë dhe se e kishte gjetur më pas të zhytur në ujë.
Megjithatë, hetimet mjeko-ligjore e hedhën poshtë këtë version. Autopsia përjashtoi mbytjen si shkakun e vdekjes dhe zbuloi lëndime të shumta, si të brendshme ashtu edhe të jashtme, të cilat ekspertët i vlerësuan si të qëllimshme. Mjekët e identifikuan bllokimin akut të rrugëve të sipërme të frymëmarrjes si shkakun e vdekjes, që mund të ishte shkaktuar nga asfiksia ose nga futja e një objekti në gojën e fëmijës.
Prokuroria theksoi se foshnja kishte përjetuar një fushatë sistematike abuzimi fizik dhe seksual gjatë muajve me çiftin. Sipas hetuesve, aktet e dhunës ishin të rënda dhe ishin regjistruar materiale audiovizuale të paligjshme. Kjo çështje ka shkaktuar reagime të ashpra në Britani dhe ka ngritur shqetësime mbi procedurat e monitorimit pas adoptimit të fëmijëve, me autoritetet që kanë premtuar një shqyrtim të hollësishëm të rrethanave që çuan në këtë tragedi.
