Shqiptarët që jetojnë në Shtetet e Bashkuara i janë bashkuar valës së protestave kundër projektit turistik të planifikuar në zonën e mbrojtur të Zvërnecit dhe Lagunës së Nartës. Në New York, qytetarë të diasporës shqiptare u mblodhën pranë Konsullatës Shqiptare për të shprehur kundërshtimin ndaj ndërhyrjeve, që rrezikojnë një nga ekosistemet më të rëndësishme natyrore në Shqipëri.
Protestuesit kërkuan mbrojtjen e zonës së Nartës dhe Zvërnecit, duke theksuar rëndësinë e ruajtjes së biodiversitetit dhe të pasurive natyrore të vendit. Tubimi në New York u zhvillua në të njëjtën kohë me protesta dhe aktivitete të ngjashme në Shqipëri dhe në qytete të tjera të diasporës shqiptare.
Reagimi i diasporës vjen në një kohë kur projekti i planifikuar në Zvërnec ka tërhequr vëmendjen e mediave ndërkombëtare dhe ka nxitur debate të forta mbi ndikimin e tij në mjedis dhe në zonat e mbrojtura. Protestuesit deklaruan se do të vazhdojnë të ngrenë zërin për mbrojtjen e trashëgimisë natyrore shqiptare, duke kërkuar transparencë dhe respektim të ligjeve mjedisore.
