Dy persona humbën jetën dhe deri në 35 të tjerë mbetën të plagosur si pasojë e të shtënave masive të ndodhura herët në mëngjes në Georgia, SHBA, gjatë një feste në natyrë.
Sipas Byrosë së Hetimeve të Georgias, ngjarja u shënua rreth orës 1:25 të mëngjesit, ndërsa më shumë se 1,000 të pranishëm kishin marrë pjesë në një festë. Në momentin e ngjarjes, forcat e policisë ndodheshin në vendngjarje dhe po mbanin nën vëzhgim turmën.
Një video që po qarkullon në rrjete sociale pasqyron panikun që shpërtheu menjëherë pas të shtënave, ku të frikësuarit u përpoqën të largoheshin me nxitim, duke krijuar kaos dhe duke u shtyrë mes tyre, ndërsa policia përpiqej të rivendoste rendin.
Mjeku ligjor i Qarkut Dooly, Brett Walsh, bëri të ditur se dy burra, respektivisht 20 dhe 23 vjeç, kanë ndërruar jetë nga plagët e marra. Familjarët e tyre janë informuar, ndërkohë që autoritetet nuk kanë publikuar ende identitetin e viktimave, pasi hetimet vazhdojnë.
Sherifi i Qarkut Dooly, Craig Peavy, deklaroi se të paktën 50 persona janë qëlluar në dy vende të ndryshme që ndodheshin rreth një bllok larg nga njëri-tjetri. Ai shtoi se 25 prej të plagosurve janë dërguar në spitale dhe theksoi se numri total i të lënduarve mund të shkojë në 35.
