Pasditen e së enjtes, një alarm për një objekt të dyshuar si mjet shpërthyes në Stacionin e Autobusëve të Prishtinës mobilizoi forcat e Policisë së Kosovës.
Zëdhënësi i Policisë për rajonin e Prishtinës, Enis Pllana, konfirmoi se autoritetet janë informuar rreth orës 16:30 dhe kanë ndërmarrë menjëherë të gjitha masat e nevojshme të sigurisë.
Pllana theksoi se njësitet përkatëse janë të pranishme në vendin e ngjarjes, ku vijojnë të verifikojnë dhe të analizojnë informacionet e pranuara.
Zona përreth është izoluar nga policia, ndërsa pritet që pas përfundimit të kontrolleve dhe vlerësimit të situatës të jepen njoftime të tjera zyrtare.
