Deklaratat e trajnerit të Partizanit, Ylli Tomori, pas përballjes me Vllazninë kanë hapur një debat të ri rreth situatës së klubit shkodran.
Tomori kërkoi më shumë mbështetje për Vllazninë, duke u ndalur te vështirësitë që po kalon skuadra dhe te pesha që ka klubi në futbollin shqiptar.
“Më dobët se kaq nuk ka ku shkon ekipi shkodran. Po kërkoj ndihmë për Vllazninë sepse e di mirë se kush është kjo skuadër dhe çfarë historie ka. Duhet të dalë dikush dhe ta ndihmojë për të shkuar sërish aty ku duhet të jetë”, u shpreh Tomori.
Fjalët e tij nuk kanë kaluar pa përgjigje nga Artan Kalaja. Ky i fundit deklaroi se drejtuesit e Vllaznisë janë në dijeni të problematikave të klubit dhe po punojnë për t’i adresuar ato.
“Problemet që ka Vllaznia i zgjidhim vetë dhe jemi duke u marrë me to. Nuk është nevoja të vijë një trajner nga Tirana dhe të na thotë se çfarë nuk shkon. Ne e dimë çfarë nuk shkon”, deklaroi Kalaja.
Sipas tij, një prej pengesave kryesore mbetet buxheti i klubit, i cili, sipas Kalasë, është më i ulëti në kampionat dhe ndikon drejtpërdrejt në rezultatet e skuadrës.
“Problemi kryesor për ne është problemi ekonomik. Ekipi i Vllaznisë ka buxhetin më të vogël ndër gjithë ekipet e kampionatit dhe kjo padyshim që ndikon tek rezultatet”, përfundoi Kalaja.
