Kryediplomatja e Bashkimit Europian, Kaja Kallas, u bëri thirrje Kosovës dhe Serbisë të fokusohen drejt së ardhmes, ndërsa presidenti serb Aleksandër Vuçiç vijoi të mbetet i përqendruar në të kaluarën.
Gjatë fjalimit të tij të fundit si president i Serbisë në Asamblenë e Përgjithshme të Kombeve të Bashkuara, Vuçiç përsëriti qëndrimin e tij rreth Kosovës.
Ai refuzoi të pranojë pavarësinë e Kosovës, duke e konsideruar atë ende si pjesë të Serbisë.
“Shumë prej jush kjo u tingëllon si një e kaluar e largët, por plagët që i janë shkaktuar të drejtës ndërkombëtare janë gjithnjë e më të thella dhe më të rënda. Të jemi plotësisht precizë, rendi i respektimit të Kartës së OKB-së dhe i së drejtës së bazuar në të nuk ekziston më. Atë e rrënuan ata që copëtuan territoret e vendeve të tjera për hir të interesave të tyre politike dhe ekonomike. Është e pamundur të mbyllet Kutia e Pandorës…”
Vuçiç, ndonëse nuk e njeh shtetin e Kosovës, akuzoi qeverinë në Prishtinë për moszbatim të marrëveshjes që lidhet me formimin e asociacionit të komunave me shumicë serbe.
Ai gjithashtu kritikoi komunitetin ndërkombëtar, duke pretenduar se nuk i ka realizuar premtimet ndaj Serbisë, megjithëse sipas tij Beogradi ka plotësuar kërkesat e vendosura, përfshirë bashkëpunimin me Tribunalin e Hagës.
“Na shpjegonin se duhej t’i dorëzonim njerëzit tanë Tribunalit të Hagës dhe pastaj do të rridhnin mjaltë e qumësht dhe do të lulëzonin lulet. Ne i dorëzuam, ndërsa nuk morëm asgjë.”
Pa adresuar incidentin e ndodhur në Banjskë, i cili ndodhi tre vite më parë, apo homazhet për kriminelin e dënuar të luftës Ratko Mladiç, Vuçiç iu drejtua edhe temave që lidhen me Kroacinë.
Megjithë fjalimin e zgjeruar, që përfshiu edhe mosangazhimin e Serbisë me Bashkimin Europian për sanksionet kundër Rusisë dhe përplasjet me përfaqësuesit europianë, Vuçiç theksoi se Serbia mbetet në rrugën e saj drejt integrimit europian.
