Saimir Korreshi, deputet i Partisë Demokratike, ka shpërndarë një video nga pavioni i Pediatrisë në Spitalin e Lushnjës, ku ka ngritur shqetësime serioze për kushtet në të cilat trajtohen fëmijët.
Materiali filmik tregon ambiente të degraduara të repartit të pediatrisë, me krevate të konsumuar dhe pajisje të vjetra. Përveç kësaj, në video shfaqen mure me njolla dhe çarje rreth instalimeve, lagështi si dhe një tavan që pikon ujë.
Kjo situatë e paraqitur nga pamjet hedh dritë mbi problemet infrastrukturore me të cilat përballen të vegjlit që marrin shërbim në këtë pavion.
Përmes videove të publikuara, deputeti Korreshi ka nxjerrë në pah gjendjen e rëndë në Pediatrinë e Lushnjës, duke e cilësuar këtë si një tjetër pasqyrim të problematikave që përjeton sistemi shëndetësor në këtë qytet.
