Është ndarë nga jeta në moshën 76-vjeçare Zef Gjini, një prej emrave të njohur të artizanatit shkodran, i vlerësuar për mjeshtërinë e tij në punimin artistik të drurit.
Për më shumë se pesë dekada, Gjini ia kushtoi jetën këtij profesioni, duke dhënë një kontribut të rëndësishëm në ruajtjen dhe përcjelljen e traditës së artizanatit shqiptar. Gjatë karrierës së tij ai shërbeu si kryeinxhinier i Ndërmarrjes Artistike të Shkodrës, ndërsa drejtoi edhe Shoqatën e Artizanëve dhe Zejtarëve të Shqipërisë.
Për veprimtarinë dhe kontributin e tij, Zef Gjini ishte nderuar me titullin “Mjeshtër i Madh”. Largimi i tij nga jeta lë pas një boshllëk në artizanatin shkodran dhe në trashëgiminë kulturore të qytetit.
