Presidenti i SHBA, Donald Trump, ka bërë të ditur synimin e tij për të arritur një marrëveshje afatgjatë me Iranin, e cila do të vazhdojë të zbatohet pavarësisht se kush udhëheq Shtëpinë e Bardhë në të ardhmen, përtej mandatit të tij aktual.
Gjatë një interviste në Fox News, Trump sqaroi se marrëveshja që ai kërkon me Teheranin duhet të jetë solide dhe të sigurojë që Irani të mos përfitojë armë bërthamore, edhe nëse më vonë SHBA do të drejtohet nga një president që ai e konsideroi të “paaftë”.
“Po sigurohem që edhe nëse pas katër, 15 apo 20 vitesh kemi një president të paaftë, marrëveshja që do të arrij do të jetë e përhershme. Nuk do të lejoj askënd që t’i lejojë ata të kenë armë bërthamore”, deklaroi Trump.
Kreu aktual i Shtëpisë së Bardhë shtoi se, ndonëse udhëheqja iraniane e tanishme mund të jetë më e arsyeshme se ajo e mëparshme, negociatat mbeten të vështira.
“Këta njerëz ndoshta janë më të arsyeshëm, por janë shumë, shumë të vështirë. Ne arrijmë një marrëveshje dhe ata e shkelin atë të nesërmen”, tha presidenti amerikan.
Trump pohoi gjithashtu se SHBA ka ndryshuar tashmë drejtimin e udhëheqjes iraniane dy herë dhe se tani është përballur me një grup të tretë drejtuesish, duke e përshkruar këtë si “ndryshim regjimi” në praktikë.
Këto deklarata vijnë në kohën kur përpjekjet diplomatike për të zgjidhur konfliktin mes Uashingtonit dhe Teheranit mbeten të lëkundura dhe të pasigurta.
Në një deklaratë të bërë një ditë më parë, Trump tha se Irani është i interesuar për një marrëveshje që do të përfundojë përplasjet, por deri tani nuk ka paraqitur kushte të pranueshme në sytë e tij.
“Ne duam një marrëveshje të vërtetë, jo një marrëveshje të rreme”, u shpreh ai gjatë një konference në Shtëpinë e Bardhë.
Në anën tjetër, ministri i Jashtëm iranian, Abbas Araghchi, deklaroi se Irani është i hapur ndaj dialogut diplomatik, por kërkon garanci që çdo marrëveshje me Shtetet e Bashkuara do të shmangë një konflikt të përsëritur. Ai theksoi gjithashtu se Teherani nuk do të pranojë largimin e rezervave të uraniumit të pasuruar nga territori iranian, duke e vënë këtë si një vijë të kuqe në bisedimet me Uashingtonin.
Ndërkohë, situata mbetet e tensionuar, me Shtetet e Bashkuara që vazhdojnë presionin ekonomik si edhe bllokadën detare ndaj Iranit, në pritje të hapave të ardhshëm diplomatikë.
