Trajneri i Vllaznisë, Edi Martini, ka vendosur të ndryshojë disa elementë në formacionin titullar për ndeshjen e kthimit ndaj Malishevës, krahasuar me sfidën e luajtur në “Loro Boriçi”.
Risia më e rëndësishme është rikthimi i Ardit Tafilit në mesfushë, i cili do të aktivizohet nga minuta e parë përkrah Qatos dhe Dros. Stafi teknik synon që me këtë treshe t’i japë skuadrës më shumë stabilitet dhe përvojë në mesin e fushës.
Në sulm, Martini ka vendosur t’i besojë treshes Murataj-Toma-Bala, me kuqeblutë që do të kërkojnë golin që do t’i afronte edhe më shumë me kualifikimin në raundin e dytë të UEFA Conference League.
Përballja mes Malishevës dhe Vllaznisë do të luhet këtë pasdite në “Kampi Nacional Hajvalia”, në orën 16:30.
Skuadra shkodrane e nis sfidën me avantazhin e fitores 2-1 të marrë në takimin e parë në Shkodër, rezultat që i jep kuqebluve një pozicion të favorshëm për të synuar kalimin në turin e ardhshëm të kompeticionit europian.
