Policia ka zbuluar një armë të dytë në vendin ku ndodhi ekzekutimi i Ilir Gjinit, një krim që u regjistrua mbrëmjen e datës 9 korrik në lagjen “Erdogan” të qytetit të Laçit.
Sipas informacioneve, arma e gjetur është një revolver që është dërguar për analizë, e cila do të përcaktojë nëse ajo ka qenë përdorur gjatë ngjarjes dhe kujt i takon.
Hetuesit kanë sugjeruar se nuk kanë qenë vetëm viktima dhe autori në vendin e ngjarjes, por që aty mund të kenë qenë edhe persona të tjerë të pranishëm ose të përfshirë në incident.
Autor i krimit është shpallur në kërkim Emiljan Suti alias Artur Suti. Ai ka qëlluar Gjinin me shtatë plumba sapo ky i fundit ka zbritur nga automjeti pranë hyrjes së pallatit ku jetonte. Pavarësisht përpjekjeve për t’u larguar, Gjini është ndjekur dhe është goditur sërish pranë hyrjes së godinës.
Pasi u qëllua, 40-vjeçari u dërgua me urgjencë në Spitalin e Traumës, por ndërron jetë gjatë rrugës si pasojë e plagëve të marra.
Viktima, i njohur me katër mbiemra: Kokaj, Lika, Gjini e Nure, dhe autori ishin banorë të të njëjtës lagje, ndërkohë që kishin pasur një konflikt disa kohë më parë.
Sa i përket Emiljan Sutit, alias Artur Suti, ai është një emër i njohur për policinë. Suti ka marrë dënimin me 5 vite burg për “kanosje për shkak të detyrës” dhe ka precedent penal për armëmbajtje pa leje. Ai ka qenë i arrestuar në Belgjikë për akuzat e vjedhjes. Po ashtu, në vitin 2011, ai ka arritur t’i shpëtojë një atentati para komisariatit të Kurbinit.
