Një operacion i gjerë kundër krimit të organizuar është realizuar në disa lokacione në Kosovë. Sipas një njoftimi të përbashkët nga Prokuroria Speciale dhe Policia e Kosovës, gjatë realizimit të urdhërkontrollit, janë arrestuar 9 individë.
Gjatë këtij operacioni janë sekuestruar gjithashtu: 15 mijë euro, 5 automjete, 5 autobote për transport, 2 armë zjarri dhe 54 fishekë.
Pjesë e sekuestrimeve janë bërë edhe pajisje elektronike, si dhe dokumente dhe prova të tjera. Policia ka theksuar se mes sekuestrimeve është gjetur gjithashtu një shumë prej 301 eurosh në kartëmonedha 2 eurosh, të cilat dyshohet të jenë të falsifikuara.
“Pas grumbullimit të informacionit dhe sigurisë së provave, është krijuar dyshimi i arsyeshëm se të arrestuarit vepronin si një grup i strukturuar kriminal, duke paraqitur dokumente të rreme lidhur me tatimet dhe duke realizuar shitje dhe transaksione fiktive të derivateve të naftës”, njoftohet në komunikatë.
Të arrestuarit dyshohen për veprat ‘Pastrim i parave’, ‘kontrabandimi i mallrave në bashkëpunim, pjesëmarrje ose organizimi i grupit kriminal të organizuar’, ‘paraqitje e dokumenteve të falsifikuara lidhur me tatimin si dhe shmangie nga tatimi’.
