Në një reagim pas alarmit të rremë për bombë që u dha mëngjesin e sotëm në një shkollë të Tiranës, zëvendëskryeministrja Albana Koçiu theksoi ashpërsinë e ngjarjes. Ajo deklaroi se kjo situatë nuk mund të quhet një shaka e rëndë, as një provë cinike për reagimin e Policisë së Shtetit, por është një akt kriminal dhe i çmendur në thelb.
Sipas Koçiut, sjellje të tilla shpesh justifikohen nën petkun e një “lirie” të pakufizuar, por, siç nënvizoi ajo, nuk kanë lidhje me lirinë e mirëfilltë.
“Një alarm i rremë për bombë në një shkollë në Tiranë, ditën e parë të mësimit, kur oborret janë të mbushura plot me fëmijë, nuk është një shaka e hidhur, nuk është një test cinik për reflekset e Policisë së Shtetit dhe as një lajthitje e rastësishme e një mendjeje të papjekur, por një çmenduri e mirëfilltë kriminale.
Kjo lloj çmendurie që shpesh tolerohet nën alibinë e një “lirie” pa fre, nuk ka asgjë të përbashkët me lirinë e vërtetë.”
