Është identifikuar Migena Topi, 46 vjeçarja, që u gjet e pajetë në Liqenin e Thatë në Tiranë. Sipas informacioneve paraprake, dyshohet se ajo i ka dhënë fund jetës duke u hedhur në liqen.
Burime bëjnë me dije se fillimisht policia është njoftuar nga banorët e zonës për një automjet të lënë pranë liqenit për rreth 30 minuta. Efektivët kanë shkuar në vendngjarje dhe, pasi nuk kanë gjetur drejtuesen e mjetit, kanë nisur verifikimet përmes kamerave të sigurisë.
Nga këqyrja e pamjeve është konstatuar se 46-vjeçarja, e cila banonte pranë zonës, kishte lënë automjetin dhe disa sende personale, përfshirë telefonin celular dhe ilaçe.
Sipas hetimeve paraprake, gruaja ka qëndruar për disa minuta pranë liqenit dhe më pas është futur në ujë. Menjëherë janë njoftuar polumbarët, të cilët pas rreth 45 minutash kërkime kanë bërë të mundur gjetjen dhe nxjerrjen e trupit të pajetë.
Policia po vijon hetimet për të sqaruar plotësisht rrethanat e ngjarjes.
