Një aktivitet i veçantë pritet të zhvillohet këtë të mërkurë në zonën e Postribës, ku fermeri Kujtim Plangaj ka realizuar një varg prej afro 110 metrash të gjatë, të përbërë nga qepë autoktone shqiptare.
Përmes një mesazhi të shpërndarë në rrjetet sociale, ai ka ftuar banorët dhe dashamirësit e bujqësisë që t’i bashkohen transportimit të vargut në këmbë drejt Urës së Mesit, në një itinerar prej rreth 1.7 kilometrash.
Sipas organizatorit, nisma do të nisë në orën 10:00 dhe synon që vargu i qepëve të vendoset përgjatë Urës së Mesit, monumentit të njohur kulturor që shtrihet në një gjatësi prej rreth 108 metrash.
Përveç karakterit simbolik, aktiviteti ka si qëllim promovimin e qepës autoktone shqiptare, si dhe vlerësimin e prodhimeve vendase dhe traditës bujqësore të zonës.
Kujtim Plangaj është i njohur në Postribë për angazhimin e tij në kultivimin organik të perimeve dhe përpjekjet për ruajtjen e farërave dhe varieteteve tradicionale shqiptare.
