Komuniteti shqiptar në Greqi është tronditur nga një aksident i rëndë që ndodhi mbrëmjen e kaluar në Nea Peramos të Kavallës, ku dy të rinj humbën jetën.
Të ndjerët janë identifikuar si Arditi, 34 vjeç, dhe Marigleni, 36 vjeç, të cilët sipas burimeve ishin shokë të ngushtë.
Ngjarja ndodhi në segmentin rrugor që lidh Nea Peramos me zonën e Ammolofoit, ku një motor u përplas me një monopatinë elektrike. Përplasja rezultoi fatale.
Arditi, që ishte drejtuesi i motorit, humbi jetën në vend nga plagët e rënda. Ndërsa Marigleni, që udhëtonte me monopatinën elektrike, u dërgua në gjendje kritike në Spitalin e Përgjithshëm të Kavallës.
36-vjeçari iu nënshtrua një operacioni, mirëpo përkundër ndërhyrjes mjekësore, ai ndërroi jetë në orët e para të mëngjesit. Si rezultat, tragjedia la dy viktima.
Vdekja e dy të rinjve ka sjellë pikëllim të thellë, teksa familjarët dhe të afërmit përballen me dhimbjen e humbjes së dyfishtë dhe të papritur.
Për ngjarjen, autoritetet greke po vazhdojnë hetimet për të zbardhur rrethanat dhe shkaqet e sakta të aksidentit.
