Trupa gjykuese e GJKKO-së është tërhequr për të vendosur mbi masën e sigurisë ndaj Ergys Agasit, pas një seance të gjatë me përplasje argumentesh mes prokurorisë dhe mbrojtjes. Prokurorët insistuan të mbahet në fuqi masa “arrest me burg” për Agasin, duke theksuar se në duart e tyre ndodhen prova që, sipas tyre, vërtetojnë akuzat për pastrim parash dhe ndikim në tendera nga ana e biznesmenit.
Një element kyç i dosjes së prokurorisë janë disa video të regjistruara në zyrën e Agasit. Organet e akuzës pretendojnë se këto pamje janë xhiruar nga vetë Ergys Agasi dhe dokumentojnë takime me individë të ndryshëm, duke u konsideruar si materiale të rëndësishme hetimore.
Ndërkohë, avokati i tij, Maks Haxhia, hodhi poshtë pretendimet, duke theksuar se nuk ekziston asnjë provë konkrete që lidh klientin e tij me veprat penale që i atribuohen.
Mbrojtja kërkoi gjithashtu të pajisej me dosjen hetimore, kërkesë që shkaktoi ndërprerjen e përkohshme të seancës.
Pas debateve të zhvilluara, GJKKO ende nuk ka dalë me një vendim përfundimtar, pasi trupa gjykuese është tërhequr në dhomën e këshillimit. Vendimi për masën e sigurisë ndaj Ergys Agasit pritet të shpallet në vijim. Biznesmeni u vu në pranga dy ditë më parë në zonën e Plepave, pasi prej kohësh ishte në kërkim lidhur me dosjen e AKSHI-t.
