Një 60-vjeçar nga fshati Kurilë i Devollit është gjetur i pajetë mëngjesin e sotëm dhe dyshohet se është mbytyr në lumë.
Mësohet se viktima kishte shkuar për vizitë tek disa të afërm të tij në fshatin Vishocicë. Burime nga vendngjarja bëjnë me dije se ai kishte qëndruar deri vonë në një lokal të fshatit dhe gjatë kthimit për në banesë dyshohet se ka humbur ekuilibrin teksa kalonte mbi një urë, duke rënë aksidentalisht në lumë.
Sipas dëshmive të personave që kanë qenë me të në lokal, 60-vjeçari dyshohet se ishte në gjendje të dehur në momentin e ngjarjes.
Grupi hetimor i policisë, pas këqyrjes së vendngjarjes, paraprakisht e konsideron rastin aksidental. Megjithatë, do të jetë ekspertiza mjeko-ligjore ajo që do të përcaktojë shkakun e saktë të vdekjes.
Policia po vijon hetimet për zbardhjen e plotë të rrethanave të ngjarjes.
