Edhe pse po përballet me vështirësi shëndetësore, dëshira e Edmond Dibrës mbetet e njëjtë: të rikthehet në stadiumin “Loro Boriçi” dhe të komentojë sërish ndeshjet e Vllaznisë.
Komentatori i njohur sportiv dhe tifozi i zjarrtë i kuqebluve ka marrë një vizitë nga përfaqësues të klubit shkodran, të cilët i kanë shprehur mbështetjen dhe i kanë uruar shërim sa më të shpejtë.
Mungesa në stadium, largimi nga rutina e përditshme dhe pamundësia për të qenë pranë skuadrës që ka ndjekur me aq pasion, janë të vështira për Mondin. Megjithatë, ai nuk e ka humbur shpresën për t’u rikthyer sa më parë në jetën e tij të zakonshme.
“Doktor, dua të kthehem në stadium të komentoj Vllazninë”, është dëshira që ai ka shprehur, duke treguar se sa shumë do të thotë për të futbolli dhe ekipi kuqeblu.
Klubi Vllaznia i ka përcjellë një mesazh përkrahjeje, me shpresën që zëri i Mondit të dëgjohet sërish në tribunat e “Loro Boriçit”.
