Letra që kryetari i Bashkisë së Tiranës, Erion Veliaj, bëri publike sot në lidhje me vizitën e ministrit të Drejtësisë, Toni Gogu, në burgun e Fierit për t’i përcjellë tre kërkesat e kryeministrit Edi Rama, është adresuar edhe në drejtim të GJKKO-së.
Sipas burimeve pranë ekipit të mbrojtjes së Veliajt, ky dokument është dërguar sot edhe në GJKKO në kuadër të komunikimeve të vazhdueshme të Veliajt me gjykatën, të cilat kanë të bëjnë me mundësinë e pjesëmarrjes së tij në seancën gjyqësore të ditës së nesërme.
Në letrën e tij, të bërë publike në rrjetet sociale, Veliaj tregon se Rama i ka kërkuar të pranojë përfshirjen në protestat e njohura si “Flamingot” dhe ato të studentëve, duke i bërë të qartë se nëse nuk pranon, mund të përballet me akuza të reja për “prishje të rendit kushtetues”.
Po ashtu, Veliajt i është kërkuar të largohet nga drejtimi i Bashkisë së Tiranës duke ia kaluar atë Arbër Hajdarit, si dhe të ndërpresë konsultimet me Plarent Ndrecën.
