Lionel Messi e mbylli në mënyrë emocionuese aventurën me kombëtaren e Argjentinës, por në fund të ndeshjes me Beninin mori edhe një “dhuratë” krejt të pazakontë.
Argjentina triumfoi 3-0 ndaj Beninit në Buenos Aires, në sfidën që shënoi paraqitjen e fundit të Messit me fanellën e kombëtares. Ylli argjentinas ishte protagonist absolut, duke shënuar një gol nga pika e bardhë dhe duke asistuar në dy raste.
Pas vërshëllimës së fundit, Messi u rrethua nga shokët e skuadrës dhe lojtarët kundërshtarë, të cilët deshën t’i uronin legjendës për karrierën e jashtëzakonshme me Argjentinën. Por një nga momentet më të veçanta erdhi nga arbitri kilian Fernando Vejar.
Një dhuratë që askush nuk e priste
Vejar iu afrua Messit për ta përshëndetur. Pasi shkëmbyen një shtrëngim duarsh, arbitri i dha edhe një shenjë miqësore me sy.
Më pas ndodhi diçka e pazakontë: Vejar i dorëzoi Messit kartonin e verdhë dhe atë të kuq që kishte përdorur gjatë ndeshjes.
Një skenë e rrallë dhe mjaft simbolike, që menjëherë tërhoqi vëmendjen. Nuk dihet nëse Messi do t’i ruajë kartonët si kujtim nga një prej netëve më emocionuese të karrierës së tij, por sigurisht që bëhet fjalë për një “suvenir” shumë të veçantë.
