Përplasje me tone të forta mes Pjerin Ndreut dhe Sali Berishës. Kryebashkiaku i Lezhës ka reaguar pas akuzave të kreut të opozitës, duke iu kundërpërgjigjur me një sërë epitetesh dhe akuzash.
Në reagimin e tij, Ndreu e quan Berishën “spiun, komunist, përçarës, shpifës, llapaqen dhe të pabesë”, ndërsa ironizon edhe përplasjen mes tyre lidhur me çështjen e pronave.
Kryebashkiaku i Lezhës e zhvendos më pas vëmendjen te zhvillimet politike të muajit maj, duke paralajmëruar se ka përgatitur atë që e quan një “gozhdë politike” për Berishën dhe aleatët e tij.
Ndreu shprehet se deri në maj Berisha mund të vijojë me deklaratat e tij, ndërsa më pas, sipas tij, do të jenë qytetarët ata që do të japin verdiktin politik.
Në fund të reagimit, kryebashkiaku e mbyll me tone ironike, duke i thënë Berishës se për të do të ketë “4 metra” tokë falas, duke iu referuar debatit për pronat.
